即使係中價餐廳, 諗住舒服少少啦, 又要將Background music播到震耳欲聾, 試過無數次傾一晚計之後喉嚨痛.............而且好多餐廳d 檯椅排得密密麻麻, 傾計都比隔離檯聽到, 真係唔係幾暢快,
香港幾時變到想搵個靜靜地既地方食餐飯都咁難?
呢次同朋友約食飯, 就決定唔揀大街大巷, 由佐敦地鐵站向龍堡方向行5-7分鐘左右, 就黎到Chelsea, 樓下已經睇定menu, o岩食先上去!
舖頭唔算大, 但竟然有個露天balcony, 適合想食煙的朋友仔, 又唔會影響到室內用餐的客人。
好中意呢個裝飾!!!
我同朋友兩個人就揀左1個主菜2個小食同甜品黎試~
烤嫩羊鞍配雜莓汁($248)
我平時出去食野一係揀牛一係揀豬, 雞同羊都係較少出現在我的清單入面
但係見到佢配雜莓幾特別喎! 就一於試試~
一碟有3枝羊鞍, 大小平均, 而且火喉都好一致,
羊鞍煮到完全冇難入口的羶味喎! 加分! 而且肉質夠腍, 生熟度都剛剛好, 配埋雜莓好清新唔覺膩~
呢個小食係我一見到就話要食的 炒洋蔥西班牙臘腸 ($58)我好中意食臘腸! 每到冬天隔幾日就要食, 送飯真係一流!
上桌之後我都有少少估唔到個份量都算好大, 因為西班牙臘腸較濃味, 厚切又比較易膩, 好驚食唔到咁多呀...
好彩佢有唔少洋蔥中和味道, 食下一片食下又一片, 細細啖食就會食得出佢有陣甜味, 應該好適合作為下酒菜。
而家我無論係去卜餐廳都一定要點蔬菜來吃。
去日本餐廳我都會點個炒野菜, 去食西餐都要食個沙律,
呢度竟然有我最愛的椒類喎!
海鹽西班牙鬼椒 ($58)
我一直以為pimiento會係幾辣的, 但原來佢有一種微辛但唔係麻辣的味道
感覺好似尖椒咁, 唔細細咀嚼都唔會真正食到佢到底辣唔辣, 幾得意。
用海鹽輕輕烤過, 無左椒類的草青味, 好食!
留肚食甜品是常識吧?
第一次食Churros, 終於了解到佢到底係咩味喇....我一直幻想係好似餅乾條咁,
原來係冬甩+牛脷酥的味道!!
無左牛脷酥的油膩感, 而且味道比較淡, 所以大多配巧克力醬享用, 而我就覺得就咁食都好好食~
最後試埋呢個 焗朱古力焦糖蛋糕
其實我真係麻麻地香蕉......但係朱古力我又好難抗拒......結果係驚喜o既!
蛋糕口感濕潤, 朱古力夠黑夠濃唔會超甜, 竟然同香蕉味好夾!
兩人share一件就岩岩好喇!
唔知道係咪環境使然, 大家都無大聲傾計, 檯同檯之間唔會好迫, 傾計都唔會比隔離位輕易聽到,
我會再黎架!
Chelsea Garden & Restaurant
地址 : 佐敦柯士甸道7號UQ Place 4樓
電話 : 3974 0822
沒有留言:
發佈留言