▐ 吃個不停▐ 樓上Cafe 食 fine dining ♥ 樂園 Happyland...*

香港租貴, 好幾年前已經開始出現好多樓上cafe, 但大部份都比人感覺烏煙瘴氣或者食物質素參差,
好多時約朋友出去都會因為食物質素而放棄樓上cafe的選擇。
但今次跟朋友黎樂園Happyland食野, 試過之後發現原來樓上cafe都可以食到 fine dining food!

店內環境講真唔算特別好, 亦有少少迫, 不過都算乾淨企理。
仲有一隻好傲嬌貓咪鎮店, 唔多理人但又任影唔嬲, 某程度上都算好可愛。

食物方面上菜速度都算快, 而且presentation好得!! 每一碟都直情有高級西餐廳的擺盤,
一上桌已經好吸睛。

我們點了個沙律作頭盤, 呢個「松子仁有機番茄豆腐沙律」比我想像中份量多, 菜和蕃茄都好新鮮, 而且加了其他同類型餐廳較少見的松子, 多了咬口, 豐富了層次。

我們點了好幾款餐前小食, 其中一款就是「香草牛油焗特大帆立貝」, 其實我除了去食海鮮之外都甚少在餐廳吃扇貝, 不過呢度整得幾好幾入味, 而且大大粒好滿足呀。

「芝士焗有機大傘菇」切開勁 juicy, 但以60幾蚊一件的價格黎講都幾貴, share又唔夠、一個人食又太滯。

明太子泡菜釀雞翼, 明太子對我黎講本身比較濃味, 只適宜少少份量加入菜式中, 但呢個小食就重手得滯, 雞翼入面塞滿晒明太子同泡菜, 辣味蓋過晒雞翼味, 失望。  

再來是這個「炭燒虎蝦番茄汁扁意粉」(照片借用好友Cat的!), 意粉酸酸甜甜很開胃而且醬汁夠入味, 唔會汁還汁、意粉還意粉。大蝦雖然好好食但只有一隻真係唔夠喉, 意粉份量其實都唔算多, 一個女仔可能剛剛好, 男仔肯定唔夠!

呢度的扒真係必食, 水準好過好多所謂的扒房。

「厚燒美國安格斯肉眼扒」食到我地停唔到, 肉質鮮嫩一d都唔韌, 而且肉汁被鎖在扒內, 食得出除左本身件扒靚之外, 廚師都好比心機控制火喉, $198 係唔平, 但食落就知值得, 出面好多餐廳收你$218, 水準都無咁好。

除左牛扒得, 「烤焗西班牙黑毛豬肋骨配洋蔥汁」一樣出色!!!
好多餐廳都會將豬扒煎得太韌太老, 食落好痴牙又無嚼勁,
但呢度d豬扒食落好爽口, 有少少筋位但都唔韌, 配埋個醬汁好惹味! 唔食牛的朋友一定要試~~

當晚其實我地都試左招牌甜品同幾杯特飲, 不過我個人認為質素一般, 而且特飲索價太貴。總括而言雖然樂園比一般樓上cafe收費較高, 但食物味道的確也比較好。難以想像一間樓上cafe可以食到fine dining 的菜式, 如果執執裝修轉型為中低價西餐廳, 改善一下甜品和飲品質素可能會更加受歡迎!